وزير التربية اللي بش يرضاو عليه التوانسة

 وزير التربية اللي بش يرضاو عليه التوانسة

أسئلة لأي وزير تربية جديد: "تعرف ترُد الشباب يحب تونس؟ تعرف تجعل الشباب يقعد في تونس وما يهاجرش إلى أوروبا وامريكا هروبا منها؟ تعرف تعلم الشباب كيفاش يعَمْلو على رواحهم ويقطعوا مع عادة الببغائية والنقل والحفظ والسرد الممل ؟

".إذا كان ما تنجمش تحقق هالثلاثة أهداف متاع أضعف الإيمان، فُك عليك

وزير التربية اللي تستحقو الثورة الحقيقية يلزمو ينجم يحكي مع بريطانيا ومع أمريكا ومع البنك الدولي وصندوق النقد الدولي بكل ندية نعم   بكل ندية، ومن منطلق سيادي.  آما فرنسا يلزمو يحسبها أختو الصغيرة وما ياخوش عليها برشة كي تحب تتكولف في مستقبل الناشئة في تونس.

وزير التربية اللي يصلح بتونس القرن 21 يلزمو يفكر في "الدراسة في البيت" و"الدراسة على الخط" و"الدراسة المشخصنة" كبدائل أو مكملات للدراسة في المدرسة. فالتصور المبني على القسم بدا ينتهى أمره.

 وزير التربية يلزم يكون عندو سن سيكولوجي بخلاف السن البيولوجي. ويلزمو يكون عمرو 18 ماكس  وإلا باي باي الثورة الشبابية.

وزير التربية اللي يرضى بيه الشباب يلزمو يكوّن أساتذة يقرّيو بسيادة ذاتية ومن دون كلوف متاع مفقدين.

وزير التربية لبلاد كيمة تونس يلزمو يكون طيارة في استعمال وسائل الاتصال المعاصرة وما يبخلش بش يفتح صندوق البريد الالكترونيمتاعو كم مرة في النهار .

وزير التربية الجديد يلزمو يتكلم على الأقل لغتين اثنتين بخلاف العربية.

وزير التربية اللي تحتاج له تونس يلزمو ما يكونش عندو بلاصة لقطر في مخو سوى بلاصة البلاد اللي يلزمها تتأدب على يدي تونس وتتعلم تسير في الدنيا.

وزير التربية اللي يصلح بتونس يلزمو يكون فايق اللي النظام السوري هو اللي قايم بثورة موش "الثورجيين" متاع الكلوخ.

ويلزمو يكون فايق باللي الديمقراطية تجي من داخل الإنسان التونسي ومن داخل المجتمع التونسي، موش من عند أمريكا...

هكاكة تكون البرامج الجديدة ثورية يعني فيها تربية موش فيها تعويد الناشئة على طاعة السلط المستبدة في داخل تونس أو في خارجها؛ برامج ياخذوها علينا الكبار متاع توة على خاطر بش يفيقو اللي تربيتهم ماعادتش هي.

محمد الحمّار