حملة- ويني ذاكرتك الوطنية؟

إصلاح المنظومة التعليمية يبدا بإدراج مادة اسمها "ذاكرة وطنية/شعبية/عمومية". السند:

دليل سياحي قديم : بربي سامحني نسئلك ميسالش؟

سائق كار سياحة (30 س تقريبا) : تفضل.

الدليل: شَي يعمل الكيف كي نرا مينيبيس متاع وكالة الأسفار هاذي. تعرف! خدمت معاهم أول ما بداو في اوائل الثمانينات.

السائق: تبارك الله.

الدليل: خدمت معاهم في زوز مينيبس، نهبط من وحدة نطلع للخرى..

السائق: مممم

الدليل: وقتها مازالت وكالة جديدة، حتى الميكرو ما ثماش في المينيبيس.

السائق: مممم

الدليل: بربي مازال مقر الوكالة في نزل "كذا" في نابل؟

السائق: إنت تحكي على وكالة أسفار وسياحة أخرى.

الدليل: نحكي على هاذي.

السائق: هاذي في الثمانينات ما كانتش موجودة، ومقرها عمره ما كان في النزل هاذاكة، ولا هي في نابل.

الدليل: ممكن نقلت.

السائق: لا، جامي، جامي، جامي. عمرها ماكانت غادي.

الدليل: توة آنا نحكيلك بالجزئيات المملة ونت تقلي جامي! تصليشي عالنبي..

السائق: صلعم. لا إله الا الله. الله أعلم. ربما..

الدليل: آي وه، "ربما"، هاك جيت للثنية.

السائق: آما زايد، الوكالة هاذي موش هي اللي تحكي عليها.

الدليل: معناها آنا قصدتك بش نكذب عليك؟!

السائق: وين نعرف.

الدليل: الحاصل ما عادش يتحكى مع برشة توانسة. آنا غالط اللي حكيت معاك. باي.

السائق: ....