أنا تونسي، أولى لغاتي العربية، ولغتي الأمّ هي...

                                                                                                            

أنا تونسي، أولى لغاتي العربية، ولغتي الأمّ هي ...

لمّا نزل جبريل في غار حراء بوحي من الخالق على محمد صلى الله عليه وسلم وهتفلو بما ستكون أوّل كلمة في القرآن الكريم:"اقرأ"، ما كانش لا "أب" الألسنيات (علم اللنجويستيك) السويسري فرديناند دي صوصير(1857-1913) موجود ولا الـ"بابا" (مثل تسمية أب الكنيسة) متاعها نوام تشومسكي العظيم (80 سنة تقريبا) موجود. حبّيت نقلكم اللي عند العبدو لله ماهيش بش تتعدّى هكّاكة  وبرّة كونو اللغة عندها "أب" و"بابا" كيما الدين عندو إله، وهو الله عز وجل، وعندو خاتم الأنباء في شخص سيد النبي.

الهدرة هاذي تتبع في خوكم من وقتلي كنت في الجامعة 30 سنة لتالي.سي تشومسكي هاذا،ومعاه كيما نقولو توة المنافس متاعو، سي بلومفيلد، كانو ديما على لساني، في الدار ومع صحابي..حتّى خويا الصغير كان كيف يحب يوقفني عن التخميرة متاع تشومسكي يطلعلي بالإسم اللي سمّهولو هو: "شمسكي".هههههه.

سي نوام نشومسكي هاذا لقيت عاملينلو جروب متاع أحبّاء في الفايسبوك.وفتلّي عملت نظرة على التعاليق، دخت في أمري بخصوص العظمة متاع السيد هاذا(اللي يدافع على فلسطين وعلى العراق أكثر مني ومنك).آما وقتاش زد تأكدت اللي آنا في الطريق الصحيح بخصوص المقارنة اللي قاعد نقدملكم فيها، وقتلّي سيدة من أحبّاؤو عرّفت بيه على أنّو- أستغفر الله- "الرب".

بون، وقتلّي يرجع علمنا وخبرنا لها المواطن التونسي اللي يكتبلكم، بالطبيعة يمكن نوافق السيدة اللي تشومسكي، كيف ما نقولو أحنا، الـ"بب" وإلاّ، تتقال حتى بتفدليك، الرّب متاع اللنجويستيك، لكنّي بش نأكدلكم اللي ما نفدلكش بالرب متاعنا أحنا المسلمين، الله الواحد الأحد الذي لا علم لنا إلاّ بما علّمنا واللي ديمة نطلبوه "اللهم علّمني ما ينفعني وانفعني بما علّمتني".آمين. ما كانش، ما عملنا شي.

وبعد ما تكونو إنشاء الله فهمتوني في هاك النقطة هاذيكة بش نواصل التشبيه متاعي :

أولا، ما تتصوروش قدّاش طيارة هاك السنّة الحميدة اللي يعملو بيها يمكن 80 بالمائة من التوانسة وقتلّي ينزادلهم مولود. نقصد وقتلّي يأدّيو الآذان في أذنو اليمين ويهمسولو بإقامة الصلاة في أذنو اليسار.روعة.هبال.قرايت (ثلاث نقاط)؛جينيال.
يقول القايل: منين هالروعة وشنوّة دخلها في حكايتنا؟ هاذا اللي بش نشوفوه في النقطة التالية.

ثانيا،هالمولود اللي "يولد على الفطرة وأبواه يهوّدانه أو ينصّرانه أو يمجسانه "(حديث صحيح) يا هل ترى تمّ دخولو لدين الإسلام من أيّ باب وقتلّي أذنولو وقراولو الإقامة؟ من باب الحركة الجسمانية؟ لا، لأنّو ما عمل شي هو. لا يعرف لا يصلّي ولا يصوم و لا يزكّي ولا يحجّ. باين أنّو دخل للإسلام من باب اللغة: سمع وخزّن اللي سمعو. وماهوش بش يستغنى على اللي سمعو.وهوني عندي آنا صارت لوغتو الأم هي الإسلام. وهذا افتراض.الله أكبر وأعلم.

وفي صورة ما إذا الطرح متاعي ما هوش شادد مليح، عندي زوج حلول:

حل آني و فوري يتمثّل في محاولتكم ربط كلمة "اقرأ" بهاذا الطرح. وإلاّ يمكن نرشدكم على منافع "القراءة بصوت عال" على مسامع الصغير منذ نعومة أظفاره، أي منذ عمرو بضع ساعات.إي نعم. ويذا كان اتفقتو معاي إللي الأذان والإقامة هي عبارة على "قراءة بصوت عال" فنطلب منكم تطبيق المنافع اللي يحكي عليها العلم الحديث على موضوع الرضيع اللي يصير مسلم باللوغة واللوغة هاذي هي الإسلام كيف ما افترضنا.شوفو الأمريكي جايمس ترليس (الحروف 20،18،5،12،5،1،19،5، في اللقب؛المعذرة) وآش يقول على "ريدينج ألاود" باللغة الأجنبية الأنكليزية...

أمّا الحل بعيد المدى فإنّي نوعد قرائي الكرام اللي آنا بش نواصل في ها المسألة والبقية ستأتي بعون الله.واللي نحب نقولو في الختام، واللي هو، في الأصل، مخ الهدرة ومبني على الفرضية متاع كونو الرضيع يسمع لغة الإسلام فيصبح مسلم باللغة هوأنّ الإسلام يتفوّق على اللغات الكل بكونو دين عندو جانب منّو يشتغل مثل اللغة...
بلغة أخرى: أنا تونسي، أولى لغاتي العربية، ولغتي الأمّ هي الإسلام.الله أكبر وأعلم.

محمد الحمّار