يا سي الراجحي، بياع الهوى راح فين؟

يا سي الراجحي، بياع الهوى راح فين؟

الصجافة الورقية، متاع السواد والمداد و الارتزاق والربح من الإشهار بأعراض الناس واللي حتى الموتى ما سلموش منها، طلعت علينا يوم الاثنين بخبر مقتل المسلم أسامة بن لادن؛ تقولش عليها تخدم لفائدة الأمريكان وإلا آش لزها تقفف باسم إنارة الشعب؟
 
ويومها في المساء ومن الصدف اللي لوكان يسمع بيها عبد العزيز العروي إلا ما يتصرف من  قبرو يجي مادد طولو، طل علينا السفي الفرنسي (ما جاش على قرقوش قلبي ماهو بصراحة) بش يفرحنا ويحفلنا بعد ما حفلتنا الصحافة المغرورة والبارعة في  بيع أعراض المسلمين: قالنا "هاو عندي شاك بما قيمتو ما نعرفش قداش من مليار أورو، بش نرشق بيه على تونس وعلى شعب تونس".
 
بجاه ربي السيد هذا يسخايبنا أمة تلاويح وإلا مادين يدينا ليه؟ يحسايب تونس خليلتو؟ لوكان مشاو زادوهم على رواحهم يقاومو بيهم القمل اللي كلالهم روسهم كان خير.
 
مرة نقول  لكُلو من بن لادنن ومرة نقول من الجرايد متاع التعاسة  وإلا آش لز الواحد يقرا صحافة تبيع في الهواء والريح للمراكب. ومرة أخرى نقول هواها هو اللي جابلنا واحد كيما هاذاكة يبيعينا في الهوى ، وبأي لغة؟ بلعربي. ياخي ما يعرفش اللي ما ينجم العربية كان اللي يصير مسلم وإلا  يكون عايش أب عن جد مع المسلمين كيف ما أدباء المهجر في لبنان؟ ياخي ما يعرفش علاقة الحب والمودة والتضامن بين العربية والإسلام؟  ياخي ماعداولوش تاست قبل ما يجي في مهمة لهالبلاد الشامخة؟ يا خي ما سمعش بيه بن لادن وإلا هو جاينا بش يخلقنا بن لادن آخر بعد ما مشى الأصلي وغبر؟ زعمة  نسألو الراجحي: آش كونو بياع الهوى، وبياع الهوى راح فين؟

م.ح