بلدية باردو وديمقراطية الزبلة

بلدية باردو وديمقراطية الزبلة

من بعد العيد الكبير لليوم ومصلحة رفع الفضلات التابعة لباردو-قصر السعيد، وخاصة في حي المُربين بخزندار،ماهيش قايمة بواجبها بصفة منتظمة في تخليص المتساكنين من الفضلات المنزلية اليومية. ليلة يجيو واثنين ما يجيوش. نهار يوصلو للمكان الفلاني ونهار يدخلو لداخل الحي.السكان  راهم يتذمرو من هالحالة هاذي والكأس متاع الصبر قريب تفيض..

ولاتش المسألة تحت الطلب؟ كان إنت كلمت المصلحة يبعثولك شكون يرفع الفضلات (مثال السنديك متاع البالاصات). آما لوكان تسكت ما يجيك حتى واحد وتبقى الصاشيات متاع الزبلة مكدسة ومفرتة وتسيّب في روائح كرهة وتتسبب في تعفن للناس للمتساكنين وللمحيط.

اليوم الصباح جاري كلمهم قبل س الثامنو ووعدوه بش يجيو. وقتللي روّح عند الظهر يلقى كل شيىء موجود ما مسو حتى حذ كان القطاطس والذبان. بجاه ربي هاذي وضعية متاع حي في تونس الجديدة؟ حتى في تونس قبل 14 جانفي ما صارش هاذا. ياخي المصلحة المختصة ناسها ما عندهمش ضمير؟ من اين الفجوة، من العمال الللي سواولهم وضعيتهم مؤخرا؟ من البلدية اللي ندفعولها فوق 60 د سنويا مقابل مثل هالخدمات؟

مانيش عارف كان عاملين علينا مزية يقولولنا. ويذا كان يحبونا أحنا نرفعو الفضلات يقولولنا. ويذا كان تأويلهم للديمقراطية أن نعومو ونغطسو في الزبلة على قدم المساواة مع الذبان والناموس والقطاطس والكلاب، راهو موش من شيم المسلمين أن يتركو قيمهم الأصيلة على جنب قال شنوة قال ديمقراطية. هاذي ديمقراطية زبلة.

م.ح