نحو العثور على قاتل شكري بلعيد

نحو العثور على قاتل شكري بلعيد

بعد مااستمعنا لحديث أجراتو إذاعة "شمس آف" آم مع صحفي الاستقصاء متاع موقع "نواة" (يوم الاثنين 25-2-213 بين س8 وس 9) بش نحاول نساهم بالتلخيص التالي في تسليط الضوء على القضية المطروحة خاصة وأنها ماشية في طريق التقاطع مع قضية اغتيال الشهيد الزعيم شكري بلعيد:

الموضوع: تم تسجيل ونشر على موقع  "نواة"  2 فيديوهات (في 26 و27 ديسمبر 2012)  فيها علي الفرشيشي (صاحب شركة خدمات؛ رئيس النيابة الخصوصية بالمدينة الجديدة، مكتب الياسمينات، بن عروس؛ نهضاوي) وبلحسن نقاش (موظف بالسكك الحديدية؛ نهضاوي) يحكيو مع رجل الأعمال فتحي دمق، (زعمة زعمة هوما من المخابرات في نظر مشاهدي الفيديوهات)، يستدرجو فيه في مسائل اختطاف وسلاح واغتيال ومن الجملة يستدرجو فيه بش يغتال بعض الشخصيات المعروفة. هكاكة تكون الجرائم هاذي إيذا كان صارت، ملقاة على عاتق فتحي دمق.

 بينما بدا يتبين (لدى صحفي الاستقصاء متاع موقع نواة) اللي الزوز أشخاص هاذم وكذلك الشخص  الثالث اللي ذكروه واسمو كمال العيفي (عضو الهيئة التأسيسية بحركة النهضة مقيم في فرنسا ومدير المركز الإسلامي "التوحيد " هناك) ما هُمش من المخابرات ولا من البوليس. هكة ممكن يكونو تابعين لجهاز موازي وممكن يكونو متورطين بصفة أو بأخرى في جريمة قتل شكري بلعيد.

 علاش وكيفاش؟

 يوم 23-2-2013 "نواة" نشرت فيديو آخر يكمل الحلقة المفقودة و يزيد يسلط الضوء على القضية.

 يستنتج صحفي "نواة" اللي العملية ماهيش متاع استعلامات.

يستنتج صحفي "نواة" شكون مشرف على هالعملية.

 يستنتج صحفي "نواة" اللي العملية المراد منها تحويل فتحي دمق إلى كيش فداء.

ويتساءل الصحفي: كبش فداء علاش؟؟؟؟

للجواب:

 الملاحظ أنّ أحد هذه الشخصيات اللي سماوها علي وبلحسن لفتحي دمق هو شكري بلعيد.

 في جملة الفيديوهات، اللي هي منشورة من طرف الجهة اللي وراء علي وبلحسن، تم تبديل تاريخ نشرها بش ما تظهرش على حقيقتها ، يعني بش ما تكونش حجة على اللي هي مخدومة قبل تاريخ 13 نوفمبر 2012 (تاريخ أول محضر في قضية فتحي دمق وانطلاق الأبحاث ضده). والدليل اللي في حوزة الصحفي أنو واحد من الفيديوهات مسجل في وسط سيارة فيها راديو مفتوح ويحكي على حدث بش يقع في يم 2 نوفمبر (مما يعني 13 نوفمبر مازال ما جاش).

  في الأشرطة علي وبلحسن يوصفو لفتحي دمق طريقة الاغتيال متاع الشخصيات اللي زعمة زعمة هو ينوي يغتالهم (يإيعاز منهما على أنهما مخابرات). وهي طريقة تتطابق مع الطريقة اللي اغتيل بيها شكري بلعيد: استعمال الدراجة النارية؛ طلق النار من مسدس ثم الهروب على متن الدراجة النارية.

 رصاصة 9 مم ثابتة في التحقيق.

 تم التحقيق مع علي وبلحسن كمتهمين ومع هذا هوما في حالة سراح.

 الصحفي متاع نواة عندو تصريح من عند الحارس الشخصي لراشد الغنوشي كَون أطراف من النهضة طلبت منو يدرب مجموعة من الأشخاص على فنون القتال. وبعد ما كان الصحفي متحفظ جاء شنوة اللي يجعلو يزيد يتأكد من الخبر: وقتللي سمع  زياد الهاني في التلفزة وقتللي صرح كَونو مسؤول يدرب في أشخاص على فنون القتال (بصفة موازية).

المراجع

 الفيديوهات والوثائق ونص قناة "نواة":

http://nawaat.org/portail/2013/02/22/tunisie-appareil-parallele-lie-a-ennahdha-kamel-aifi-dammak-chokri-belaid/

فيديو لحديث صحفي "نواة" لشمس آف آم

http://www.shemsfm.net/fr/video/kamel-aifi-membre-du-comite-fondateur-d-ennahdha-serait-implique-dans-l-affaire-fathi-dammak-ramzi-bettibi_39374

تسجيل صوتي لنفس الحديث

http://www.shemsfm.net/fr/replay_emission/la-matinale_112