الفطيرة وبنيّاتها

الفطيرة وبنيّاتها

تعرفوها الفطيرة و"بنَيّاتها"؟
كي كنا صغار و يبعثونا للفطايري بش نشريو فطاير كبار من عاداتو  يْودّّنا بفطاير صغار (حجم كعكة )...
عاد توة الفطيرة الكبيرة اللي دايرين بيها كعيبات صغار صورة ماعادش موجودة عند فطايري الحومة، خسارة...
لكن ثمة ناس من كثر محبّتهم ليكم، حبّو يحيو هالعادة وما يحرموش منها لا الغنيّ ولا الزوّالي... آش عملو؟ 
هالناس هاذوما جاو في بلاد العرب والمسلمين وفي كل قصر متاع رئيس نصْبو فطايري...هكاكة صار عندنا فطايرية مِلبريمة يشرف عليهم زميم الفطايرية - ما يوريش وجهو على خاطرو حشام برشة -:

على كل عندك يا سيدي بن سيدي تركيا بمثابة فطيرة كبيرة ...
ومن بعد يبدا الفطايري يِلوي في الفطاير الصغار...
هكة نلقاو في المشهد تونس أول فطيرة صغيرة
بعدين تجي فطيرة مصر
ومن بعدها تجي فطيرة ليبيا
والفطيرة الموالية هي سوريا...

لكن في اللخر آش نلقاو؟
الفطيرة الكبيرة ظُهرت محروقة...وماعد يهضمها حَد...
ويذا بيه ذبلت الفطَيرات الصغيرات بالكعبة بالكعبة...

هاي فطيرة مصر ظهرت كنافة وبسبوسة...وفطيرة تونس ربي يستر لا تطلع حنش بوفطيرة... أما فطيرة ليبيا ما فيش شك تحولت لبازين يهبط يتلقلق على المعدة...كانك من سوريا خلي عزاها سكات، من الطحينة - بالتشديد على وجود التاء- ما خرجناش..
حاصيلو الله لا يسامح أصحاب الرؤوس اللي فوقها فطيرة، ما طلعو فالحين كان في 
صناعة الفطاطير، عفوا الطراطير...
ملخر، موش نرجعو لفطايرنا خير؟

م.ح