حزب جديد اسمه "لم يلتحق" ؟

حزب جديد اسمه "لم يلتحق"؟

كي كنا صغار في المعهد الصادقي كانو يسلّفو الفقراء منا الكتب المدرسية...عل شرط التلميذ يجيب شهادة من عند "المحرّك" (العمدة توة) مكتوب فيها " يشهد محرّك المنطقة الفلانيية أنّ التلميذ الفلاني ينحدر من عائلة فقيرة"...هكة تكوّنت نوع من اللحمة والعصبية بين التلامذة المعوزين، تلقاهم كل بداية سنة دراسية يتندّرو بالإنتماء إلى ما أصبح يتسمّى "جماعة ينحدرُ"....

حديثنا قياس...بداية السنة الدراسية هاذي عرفت المؤسسات التربوية- وإلى هذه الساعة- نقصان كبير ياسر في الإطار التربوي...فبحيث بعض المدارس تعلّق على السبورة في الساحة ورقة مكتوب عيها "لم يلتحق" تليها قائمة طويلة وعريضة (ما شاء الله وعيني ما تضرّها) بأسماء الأساتذة اللي "لم يلتحقو" ....واللي هومة كي تجي تشوف تنطبق عليهم عبارة "لم يعيّن بعدُ من طرف سلطة الإشراف أكثر منه عبارة "لم يلتحق"....

ملّخّر يظهرلي ثمة شكون فطن اللي المجتمع التونسي تنطلي عليه بسهولة فكرة الديمقراطية والأحزاب فأصبحو يستنبطو كل الطرق بش يشكّلو بيها أحزاب جديدة...طبعا توصف الواقع...وتخدم المصالح والحاجيات الحقيقية للمواطن...ولعلّ آخر هذه الأحزاب هو حزب "لم يلتحق"...اللي بش يغطي كما ينبغي على التكمبينات الحقيقية للإدارة المركزية وكذاك المندوبيات الجةوية اللي تعوم وتغطس في مستنقع " لم نعيّن بعدُ الأساتذة المناسبين، من ذوي القرابة والمقربين والأحباء والأحبة والمحبوبين والمستحبّين على حساب المكروبين والمكرّبين والمكروهين والمُكرَهين ....في تلك الأماكن المناسبة...."

محمد الحمّار