30 X اتصالات تونس تتمعّش من شباب النوفيام: إرسالية

30 X اتصالات تونس تتمعّش من شباب النوفيام: إرسالية

ساعات يضحّكوني برشة ناس كبار وصغار كيف يندهشو وقتلّي تقوللهم راهو الغشة والقلبة موش باهية وراهي ثمّة علاقة سببية بينها وبين مصير شعب كامل أو أمة كاملة بخصوص قضية الحق المسلوب في فلسطين وغيرها من قضايا الرقي والتقدّم. ها الناس هاذوما يقولولك "آش دخّل عشانا في فطورنا؟". عاد نقوللهم مرّة أخرى راهم غالطين. ومثال اليوم ناخذوه من الوضعية التالية: كيفاش وقتلّي تتفطّن لعملية غش "عادية" تحس بنشوة تخلّيك تبحث على أسباب "غشات" أخرى.والربح يجيب الربح.ما فيش شك.
أمّا ربح المرة هاذي انتوما وآنا بش نربحوه موش اتصالات تونس. هاذي الأخيرة خرّجت إعلان بش تصوّر بيه خبيزة بمناسبة "النوفيام".آش يقول نص الإعلان في الراديو؟ يقول:  "اكتب "ناف" ثمّ فراغ ثم رقم الترسيم المتكوّن من ستة أرقام. وارسلها للموزع الصوتي 87021..وراهو ثمن الإرسالية موحّد ويساوي 600 م".
وفي الواقع آش يصير؟ ياخذ الشاب أوالشابة اللي عدّا المناظرة التلفون ويكتب "9 فراغ..."     ويذا بيه الشاب ييتكونسة ويطلب النجدة من والديه:"آش بيهم قالولي ما عندناش الرقم هذا؟" وترصّيلو ياكل فجعة ويظن اللي هو موش مسجّل جملة. ثمّ بنصيحة والديه،و كيف ما جات جات وبحرارة الروح ، يعاود المسكين إرسالية أخرى( ودفعت بلى في 600 م اللي مشاو. تي ماهم يقولو حاشاكم الّي "يسكر" ما يتاجر.برّة نحسبوها هكّاكة) والمرّة هاذي يطلع الشك في إمكانية إضافة رقم آخر على الستة أرقام وإلاّ في "الفراغ" يمكن نساه المرّة لوّلة وبرّة عاد (ظاهرلي بش تولّي "سكرة" بالمنجد). كي العادة يتبلعو الـ600 م والردّ يكون في مستوى فجعة متاع واحد  قالولو اللي هو ما نجحش.
في الثالثة خطفت. وتعرفوش بآنا سر ربّاني خطفت؟ تي ماهي ظهرت "الناف" لاهي الكلمة اللي بالعربي، لاهي الرقم "9". طلعت الكلمة الفرانسوية "آن – الحرف 5  – وهاك اللي ما فمّاش بالعربي – آف" = "ناف".
توّة موش شي يدوّخ هاذا؟ ياخي ما ينجموش يقولو في الإعلان :"الرجاء كتابة كلمة "ناف" كاملة بالحروف اللاتينية". ويذا كان لزم يزيدوها عبارة " من كتب غير ذلك يسحب منه المبلغ ثمن الإرسالية الخاطئة وما يلوم كان روحو". وإلاّ آنا نحلم؟ وإلاّ الوليّ اللي ما تعجبوش أنّو يتكلّفلو الميساج بـ1800م بش يسمّى قرنيطة من طرف عقلية "التونسي تلكوم" ويخاف لا يفلس لوكان دفع : 60 (الثمن الأصلي للإرسالية من غير ما نحكيو على عرض الصيف اللي بش تولّي فيه بـ20 م) نضربوهم في 10 يولّيو 600 =السوم اللي متفاهمين عليه ومن بعد 600 و 600 ياخي ما همش داخلين في الحسبة؟ وإلاّ عربون النجاح بالمسبّق؟ وإلاّ المبروك قبل وقتو؟
هاذا مع العلم اللي جراتلو العملة تلميذ بوه وأمّو يعرفو يقراو ويفهمو النوامر والأرقام . وتعدّات عليهم. سبحانو اللي ما يسهى وما ينسى.لكن آش نقولو اللي الولي متاعو ما هوش قاري ويدخل بعضو بين "الناف" و"9" و"التسعة و"تسعة"؟ يكلفوهالو بـ 20د ؟
يا خوية أحنا في بلاد التعليم فيها مازال مجّاني. الحمدو الله. علاش بعض الشركات والمؤسسات ترد في القراية بالفلوس؟ يا خوية فهمونا.
على كل اللي نتمنّاه هو أنّو ينجحو ها الشباب العظيم متاع تونس العظيمة.شبان وشابات يحلمو بش يراو غزّة وفلسطين متحرّرة وبش تكون عندهم خدمة باهية ينفعو بيها التوانسة والعرب ويصوّرو منها ما يسمحلهم بش "يفيّسو" بيه على اللي يبثّو في الغشة في العالم لكن من غير ما يغشّو بعضهم.إن شاء الله الناجحين متاع النوفيام يتعلمو كيفاش الواحد يطيح ومن بعد يقوم من دوخة التينيزي تلكوم.
محمد الحمّار