الدين يلزم يعاود يتوزّع على العباد والأحزاب بالقسطاس المستقيم

الدين يلزم يعاود يتوزّع على العباد والأحزاب بالقسطاس المستقيم

ثمة شكون قاللي آش بيني شديت صحيح في نقد حزب النهضة دون الآخرين. وقاللي اللي هاذة يدل على أني أتحاشى إغضاب الأحزاب الأخرى. ماهو فاهم شي هاالمواطن. وهاهو بيان المسألة: راني كي ننقد النهضة ننقد في فكر غير عادي أعتبرو مرَضي والمريض المجتمع كلو. النهضة جابتها لروحها على خاطر الخلفية الدينية. وهاك الغناية متاع "هانا نقولو اللي أحنا حزب مدني" ما يحكيوهاش للي تولدت النهضة قدامو. واللي يحب يعاند يجاوبني على ما يلي: ياخي كي يمشي الغنوشي لبلاصة ويستقبلوه آلاف من الناس يا هل ترى يستقبلوه على خاطر "مدنية" حزبو المزعزمة؟ فيقو يا ناس.
 عاد قلنا اللي عندو خلفية دينية الأمر متاعو يهم الـ11 مليون تونسي (ناقصين كعيبتين موش مسلمين). لذا كي نحكي عالنهضة نحكي على الدين بش يرجعلنا متاع الناس الكل.مايقعدش حُكة حليب كونسونتري .الدين يلزمو  افتكاك من عند النهضة ثم إعادة توزيع بالقسطاس المستقيم على العباد والأحزاب.
أما عن الأحزاب الأخرى اللي صاحبي يسخايبني نخاف لا نغضبها يكب سعد العار كيما تقول أمي يرحمها. ما نيش حاسبهم جملة. وقتاش نحسبهم، وقتللي يفيقو  ويفهمو اللي يلزم يطالبو بنصيبهم من الكتلة العامة للدين (اللي توة كونسونتري في النهضة).

محمد الحمّار