Travail à la chaîne
Travail à la chaîne
يقول المثل الشعبي "ما يعرفوه بقري كان بالكِرشة". وفعلا أحنا في تونس نصف الشعب ما يعرفو ما يسمى منذ عهد الثورة الصناعية "ترافاي آلا شان" إلا في السياسة الرعواني، ما يعرفوهش "الشان" أو السلسلة في الصناعة متاع الاقتصاد القويّ. فبحيث السلسلة و اللي هي آخر صيحة عندنا واللي تتميّز بيها فيئة معيّنة هي: إذا كان يعجبك المرزوقي فأنت من أنصار النهضة، ويذا كانك تحب النهضة رد بالك ما تحبّش قَطر، ويذا إنت عاشق في قطر حذاري تقول تركيا موش باهية، ويذا إنت ولهان في تركيا إياك ما تشتمش السيسي وما تصليش ركعتين بش يرجع مرسي، وإياك تكون مع سوريا ونظامها، رد بالك راك مع الثورة والثورة تحب تنطح سوريا نطحا...والسلسلة متواصلة و ربما ماهيش بش تتكسّر حتى بالانتخابات. ماللخّر، وقتللي يجي نهار نشوف هالناس ممكن يعجبهم المرزوقي وفي ذات الوقت ينقدو الكذب والسرقة والنهب متاع النهضة، وفي الآن ذاته يتمناو لو كانت تركيا صديقة العرب، ويناضلو من أجل طرد وحوش الحرب الخفية من الفضاء السوري والعراقي والليبي واليمني...وقتها تكون السلسلة تكسرت ونقدر نخلق لنفسي الرغبة في الانتخاب.
م.ح