لا القرضاوي ولا الإنسلاخسلاميّون يقرضون

  
لا القرضاوي ولا الإنسلاخسلاميّون يقرضون             

النخبة الصغيرة متاع المثقفين متاعنا علاش ديما تبهبر و تشبرش كيف هاك السردوك وإلاّ هاك القطّوس السارف؟                                                                                                         
 
توّة ملّي جاء سي آشسمو هو هوّة متاع الدين،تي القرضاوي،والجماعة تندّد وتصحّح في العرايض وتكتب في المدوّنات.توّة داكوردو آنا معاهم قي كون السيد هاذا ما ينفعتاش لا دنيا لا آخرة والسبب بسيط لكنّو هوة ما يعرفوش:إلّي أحنا في تونس تربّينا على مناهضة الدروشة منين هبّت و دبّت. وفي الستينات والسبعينات تخلّصنا من الزّايد اللّي ما كانش عندو علاقة بالدين.وهالشّي هاذا خلاّلنا حاجتين،وحدة خايبة ووحدة باهية.                                                                                                                  
كانك من الخايبة فهي كونو برشة ناس نقموعلى التحولات اللّي صارت في الدّوسي متاع الدّين واعتبروها مروق و تشجيع على التفسخ            والإنحلال الأخلاقي.وهالناس هاذوما (إيذا كانهم حيّين) وإلا أولادهم وبناتهم هوما اللّي يفرحو بشيخ الشيوخة كيف يجي كيما نتصوّرهم     فرحو وقتلّي جاء مؤخرا للقروان.هاذوما يراو فيه تعويض للّي فات..                                                                                                                         
لكن "اللّي تعدّى وفات زعمة يرجع؟" هاذا هو السؤال لولاني.أما الجواب فهو حسب رايي:مستحيل.علاش على خاطر الّي كان من المفروض يصير(وهاذي كانت تكون الحاجة الباهية) بعد هاك التقرقيشة عالعظم ما صارش. وهو البناء الفكري الصحيح (بني عالصّح) فوق هاك البلايص اللّي خلاّتهم تنحية الدروشة و   الأساطير فارغين.وشكون الّي ما خلاّوش البني يتم لا سو لا سويّة؟ هوما هاك المثقفين الّي اليوم يسمّيو فيهم بالغالط "علمانيّين" أو "لاييكيّين".هاذوما يا سيدي ما وصلهمش الميساج، فعجبتهم اللّعبةو ما مدّوش يديهم للبركة يعني بش يبنيو على الصّح كيما قلنا.وهوني نفهمو علاش آنا بصراحة يظهرلي لوكان ما كانو هوما هكّاكة ما كان يجي سي شسمو هو                  

توّة ماو نتكلمو بموضوعية:اللّي يسميو في رواحهم غلمانيين آنا نخاف لا يطلع كلام سي محمّد الطالبي صحيح وقتلّي طلعّلنا ( و يرحم فمّو في هاك الكلمة) بعبارة "الإنسلاخسلاميّين" يعني اللّي هوما  موش حتى ملحدين بش نقولو راهم حرار كيف ما تحب قوانين الدنيا والدّين. أما هوما ، خويا لعزيز ، "لاهو لاهو": لاهوما  ملحدين جهار في النهار لاهوما مؤمينن و يحبّو يعملو حاجة لأمة محمّد بش هكّاكة لا تقعد    تستنى لا في سي القرضاوي لا في سي عمّار بو الزور بش يجي يورّيها دينها.تي ملو هاذا المشكل.                                 
إيذا كانهم ما همش هكّة بربّي يقولونا اليوم قبل غدوة آشنوّة اللّي عملوه بش يخلّي القرضاوي و أمثالو ما يطمعوش في مومنين تونس بش   يتصنتوهم  ولاّ بش يقولولي ما عندناش مومنين يغيرو على دينهم؟                                                                   دينهم؟                                                                                                                                                                                                                                
ويا لندرا توّة بش نخلّيو ولادنا يحلّو في وذنيهم لأبواق ما عادش تسمع خاصة كيف تبدا آمبورتي عاد...أبواق حفات من الصياح بالهفّي وفي غير المقام:مقامات العلم و تبديل العلم حسب النظرات الجديدة...أما خير نقرضو ولاّ نsنستنّاو حتى نتقرضو اله لا يقدّر علينا؟                     
.

Comments

[infrajtihadiste]

كيف تحضرلي ماما ملوخية بالأرانب وانا ما ناكلهاش آش نعمل؟ نعطيها بوسة مرصوصة فوق جبينها و نقوللها "ماما آتو نشد ييدي بكسكروت من عند "ولد الحاج" آمانعرفك نهار آخر بش تعملّي الصحن اللّي نموت ونفنى عليه : لبلابي محرحر نودّك ليس نشهّيك ونت ماكش مشتاقة با امّيمة يا غالية

[Ghoul]

المشكل الصحيح، إلّي انت ماتطرّقتلوش ، ماهوش زيارة القرضاوي في حدّ ذاتها بل كونها الدولة التونسية هي إلّي استدعاته