مركاتو الربيع : القرضاوي في البطولة المحلّية ؟

                  

للّي ما يعرفش نقول اللّي الإستقطاب الثنائي هو في الأصل عافانا وعافاكم الله مرض مزمن خرجو منّو في المغرب و في الدزاير وفي مصر وفي الأردن وأحنا ما زلنا في طنبك الإستقطاب بين علمانيين و إسلاميين. يا خويا آنا يظهرلي هاالوضعية ما هيش نورمال وحلاّن هالمشكلة أصعب من  حاشاكم عشرة دوكتوراه. وقتلّي المعضلة عندها أقل شي عشرين سنة وما تداواتش. يعني ماتو ناس و تولدو ناس وحنا ما زلنا مستقطبين. واليوم ردّو بالكم تقولو دخل في اللّعبة عنصر جديد من مركاتو الربيع (سيدي القرضاوي) تو المسألة تتحل بطبيعتها,ولّى تقولو جابلنا الصّيد من وذنو...قول يمكن المرض يولّي إسمو "استقراض" ثنائي  وهي الإضافة الوحيدة الممكنة...

فالحكاية زادت تعقّدت. كيفاش؟ ما نحبش ندخل في حكاية هاذوكم و هاذوما (حكينا عليهم المرّة اللّي فاتت يزّي (مؤقّتا...) أما كيف ما    يقولوها،كسكسلو يرجع لأصلو، حبيت نرجع بفكري وما هيتي و عقليتي واللّي هو داخل في كياني كمسلم بش نتسائل و نسئل اللّي يعتقدو في الفكرة اللّي يرمزلها سي القرضاوي: يا لندرى ضاقت علينا الرموز بعد الرسول محمد صلّى الله عليه وسلّم بش نفركسو على رضا النفس في الشيوخ؟ ياخي القرضاوي واللّي كيفو هوما برك اللّي ينجمو يذكرونا في دينّا؟ لذا هاو بش نذكرلكم من أروع ما ينجم يقرا المسلم في ها     العصر و يتعلّم منهم الجديد وقولو هاذا يعمل في البيبليستي ولّى قولو اللّي تحبّو: يا خويا كيفاش واحد ما يعرفش حسن حنفي المصري؟ ولّى "عبد النور بيدار"من فرانسا ؟ولى "أوميد سافي" من أمريكا؟ولى "عبد الكريم صوروش" إيراني عايش في هولندا...

هاذوما ناس آمنت بيهم كمستنيرين يحبّو الخير للمسلمين وما يحكيوش بمنطق التكفير والتلجيم وما تابع ذلك .هاذوما ناس ما همش غالطين في رواحهم بش يخرّجو الفتوى بعد الفتوى ...هاذوما ناس يجاوبوك كيف تراسلهم وينصحوك كان تسألهم وما يتسببوش في واحد يكتب عليهم    بالحق يخرجوه من مركزو كصحافي ... ، على خاطر ما عندهمش الزّايد اللّي كيف يكشفوهولهم يدخلو بعضهم و يظهّرو هاك النّوع من     القهر والقمع متاع بكريواللّي يكشفهم على حقيقتهم حتى لين يوصلو يولّيو ما عادش يخافو ربّي.                                       

ويا خوي،في نهاية الأمر، الواحد يقتدي بمحمد في كل شي حتى في كونو مات ما عندو شي من وسخ دار الدّنيا. ياخي قولولي الدين ياخي  تبدّل هو بش الواحد يولّي يقتدي بالميليونارات و الملياردارات؟ولّى للدّرجة هاذي يحبّو يفهمونا اللّي كل حاجة في بلاصتها؟               
لا يا سيدي إيذا كان ثمّة بالمجدّ واحد يقول بروحو قدوة للمؤمنين في هالزمان ،زمان العولمة وحوت ياكل حوت والتبزنيس بخلاف البزنس، يلزمو يكون أكثر واحد فقري موش أكثر واحد جاه وسلطان . بالطبيعة هوني نحكي علّي يحب يولّي داعية موش على من يسوس اامسلمين ،لأنّو إيذا كان هاذا الأخير من حقّو كيما من حق غيرو من اللّي يسوس فيهم بش يكوّن ثروة  فإنّو موش من حق الداعية بش يكون هكّاكة ،

اللّهم إذا أثبتلنا أنّ القرآن العظيم ما جاء فيه حتى شي يلوم علّي يكنزو اذهب والفضة و يحبّو المال حبا جمّا ...                         
في النهاية ما عليّ كان نقلكم : خلّينا نعانيو في ملاعبيّة "مركاتو" الشتاء اللّي مازالو ما لقاوش بلايصهم في الجمعيةرغم اللّي يتدربو مالصباح
للّيل و سيب عليكم من البيعات المقطعة ...اللّهمّ ‘يدا كان تجيبولنا ملاعبية من بطولات أخرى موش معروفة آما تلعب كان بش تربح...
    

Comments

[mehdi]

Il faut à tout prix défendre les acquis de la Tunisie en matière de perception de l'Islam et de son interprétation : un islam modéré qui va de l'avant. Il faut que l'élite essaie à tout prix de garder cette spécificité à la Tunisie